(ದಿನಾಂಕ: ೧೦-೦೨-೨೦೧೮ರ 'ವಿಜಯ ಕರ್ನಾಟಕ'ದಲ್ಲಿ ಪ್ರಕಟವಾದ ಲೇಖನ.)
Unedited
ಪಾರ್ಟಿ ಹಾಲ್ ರಂಗುರಂಗಿನ ಬಟ್ಟೆ ತೊಟ್ಟ ಮಕ್ಕಳಿಂದ ತುಂಬಿ ಹೋಗಿದ್ದರೆ ಎದುರಿನ ವೇದಿಕೆ ತರಹೇವಾರಿ ಬಲೂನುಗಳಿಂದ ಹೊಳೆಯುತ್ತಿತ್ತು. ಹೊಸ ಡ್ರೆಸ್ ತೊಟ್ಟು ಶರಧಿ-ಸಮನ್ವಿ ಪುಟಾಣಿಗಳು ವೇದಿಕೆ ತುಂಬ ಚಿಟ್ಟೆಗಳಂತೆ ಓಡಾಡುತ್ತಿದ್ದರೆ ಸೇರಿದ ಓರಗೆಯವರೆಲ್ಲ ಬರ್ತ್‌ಡೇ ವಿಶ್ ಮಾಡಲು ಕಾತರದಿಂದ ಕಾಯುತ್ತಿದ್ದರು.
ಕೇಕ್ ಹಂಚಿದ್ದಾಯಿತು. ಹಾಡು ಹಾಡಿದ್ದಾಯಿತು. ಒಂದಷ್ಟು ಆಟಗಳನ್ನೂ ಆಡಿದ್ದಾಯಿತು. ಇನ್ನೇನು ಮ್ಯಾಜಿಕ್ ಶೋ ಅಥವಾ ಆರ್ಕೆಸ್ಟ್ರಾ ಆರಂಭವಾಗಬಹುದು ಎಂದುಸೇರಿದ ಪ್ರೇಕ್ಷಕರೆಲ್ಲ ಕಾಯುತ್ತಿದ್ದರೆ ಪಕ್ಕದ ಚೌಕಿಯಲ್ಲಿ ಚೆಂಡೆಯ ಸದ್ದು ಮೊಳಗಿತು. 'ಗಜಮುಖದವಗೆ ಗಣಪಗೇ’ ಎಂದು ಹಾಡಿ ಭಾಗವತರು ತಮ್ಮ ಮೇಳದೊಂದಿಗೆ ವೇದಿಕೆಏರಿಯೇ ಬಿಟ್ಟರು.
ಓಡಾಟ ಗಲಾಟೆ ನಿಲ್ಲಿಸಿ ಗಪ್‌ಚುಪ್ಪಾಗಿ ಇದೇನಿದೆಂದು ಮಕ್ಕಳೆಲ್ಲ ವಿಸ್ಮಯದಿಂದ ನೋಡುತ್ತಾ ನಿಂತರೆ ಬರ್ತ್‌ಡೇ ಪಾರ್ಟಿಗೆ ಯಕ್ಷಲೋಕ ಇಳಿದುಬಂದಿತ್ತು. ಮುಂದಿನ ಎರಡುಗಂಟೆ ಕಾಲ ಸುಮಾರು ಮುನ್ನೂರು ಮಂದಿ ಪ್ರೇಕ್ಷಕರು 'ಜಾಂಬವತಿ ಕಲ್ಯಾಣ’ವೆಂಬ ಯಕ್ಷಗಾನವನ್ನು ನೋಡಿ ಕಣ್ಣು ಮನಸ್ಸು ತುಂಬಿಕೊಂಡರು.
ಬರ್ತ್‌ಡೇ ಪಾರ್ಟಿಗೆ ಯಕ್ಷಗಾನವೆಂಬ ಈ ಸರ್‌ಪ್ರೈಸ್ ಗಿಫ್ಟ್ ಪ್ಯಾಕ್ ಮಾಡಿದ್ದು ಬೆಂಗಳೂರಿನಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿರುವ ವಿಜಯಕೃಷ್ಣ. ಕ್ಯಾಂಡಲ್ ಆರಿಸಿ,ಕೇಕ್ ಕಟ್ ಮಾಡಿ, ಮ್ಯಾಜಿಕ್ ಶೋ ಮಾಡಿಸಿ ಬರ್ತ್‌ಡೇ ಮಾಡುವವರ ನಡುವೆ ತಮ್ಮಿಬ್ಬರು ಪುಟಾಣಿ ಹೆಣ್ಣುಮಕ್ಕಳ ಬರ್ತ್‌ಡೇಯನ್ನು ವಿಭಿನ್ನವಾಗಿ ಹೇಗೆ ಮಾಡಿದರೆ ಚೆನ್ನಎಂದು ತಲೆಕೆಡಿಸಿಕೊಂಡಿದ್ದ ವಿಜಯ್-ಸುಮಾ ದಂಪತಿಗಳಿಗೆ ಅದು ಹೇಗೋ ಯಕ್ಷಗಾನದ ಕನಸು ಹತ್ತಿಬಿಟ್ಟಿತು.
'ತುಮಕೂರಿನಲ್ಲಿ ಆರತಿ ಪಟ್ರಮೆ ಮತ್ತು ಸ್ನೇಹಿತರು ’ಯಕ್ಷದೀವಿಗೆ’ ಹೆಸರಿನ ತಂಡವೊಂದನ್ನು ಕಟ್ಟಿಕೊಂಡು ಯಕ್ಷಗಾನ ಆಡುವುದು ನನ್ನ ಗಮನದಲ್ಲಿತ್ತು. ಸಂಬಂಧದಲ್ಲಿ ಆಕೆನನ್ನ ತಂಗಿಯೂ ಆಗಿದ್ದರಿಂದ ನನ್ನ ಮಕ್ಕಳ ಬರ್ತ್‌ಡೇ ಸಂದರ್ಭಕ್ಕೊಂದು ಚಂದದ ಯಕ್ಷಗಾನ ಆಡಬಹುದೇ ಎಂದು ಸಲುಗೆಯಿಂದ ಕೇಳಿದೆ. ಅವರು ಖುಷಿಯಿಂದಒಪ್ಪಿಕೊಂಡು ಬಿಟ್ಟರು. ನನ್ನ ಯೋಚನೆಯನ್ನು ಮನೆಮಂದಿಯೂ ಉತ್ಸಾಹದಿಂದ ಬೆಂಬಲಿಸಿದರು’ ಎಂದು ತಮ್ಮ ಪ್ರಯೋಗದ ಕಥೆಯನ್ನು ಬಿಚ್ಚಿಡುತ್ತಾರೆ ವಿಜಯ್.
ಯಕ್ಷಗಾನದ ಯೋಚನೆಯೇನೋ ಚೆನ್ನಾಗಿಯೇ ಇತ್ತು. ಆದರೆ ಅದನ್ನು ಜಾರಿಗೊಳಿಸುವ ದಾರಿ ಮಾತ್ರ ತುಂಬ ಸವಾಲಿನದ್ದೇ ಆಗಿತ್ತು. ಯಕ್ಷಗಾನಕ್ಕೆ ಹೊಂದುವ ಪಾರ್ಟಿಹಾಲ್ ಯಾವ ಹೊಟೇಲಿನಲ್ಲಿದೆ, ಯಕ್ಷಗಾನದ ಚೆಂಡೆ-ಮದ್ದಳೆಗಳ ಸದ್ದಿಗೆ ಅವರು ತಕರಾರು ಹೇಳಿದರೇನು ಮಾಡುವುದು, ಅಲ್ಲಿ ಎಂತಹ ಸ್ಟೇಜ್ ಹಾಕಬೇಕು, ಸರಿಯಾದಸೌಂಡ್ ಸಿಸ್ಟಮ್-ಬೆಳಕಿನ ವ್ಯವಸ್ಥೆ ಹೇಗೆ ಎಂಬಲ್ಲಿಂದ ತೊಡಗಿ ಹಿಮ್ಮೇಳ-ಮುಮ್ಮೇಳದ ಸಮಯ ಹೊಂದಾಣಿಕೆ, ವೇಷಭೂಷಣಗಳ ವ್ಯವಸ್ಥೆ, ಕಲಾವಿದರಿಗೆ ಉಪಾಹಾರದವ್ಯವಸ್ಥೆ, ಬರ್ತ್‌ಡೇಗೆ ಬರುವವರ ಊಟೋಪಚಾರದ ವ್ಯವಸ್ಥೆಯೆಂದು ತಲೆಕೆಡಿಸಿಕೊಂಡು ವಿಜಯ್ ತಮ್ಮ ಸಾಫ್ಟ್‌ವೇರ್ ಗಡಿಬಿಡಿಗಳ ನಡುವೆಯೂ ಭರ್ತಿ ಒಂದು ತಿಂಗಳುಓಡಾಡಿದರು.
'ಎಲ್ಲ ಓಡಾಟಗಳೂ ಸಾರ್ಥಕ ಅನಿಸಿದ್ದು ಯಕ್ಷಗಾನದಿಂದಾಗಿ ಇಡೀ ಬರ್ತ್‌ಡೇ ಪಾರ್ಟಿಗೆ ಒಂದು ಹೊಸ ಆಯಾಮವೇ ದೊರೆತಾಗ. ಬಂದವರೆಲ್ಲ ಯಕ್ಷಗಾನದಐಡಿಯಾವನ್ನು ಮನಸಾರೆ ಮೆಚ್ಚಿ ಶುಭಾಶಯ ಕೋರಿ ಹೋದರು. ಬಂದವರಲ್ಲಿ ಹೊಸ ಪ್ರೇಕ್ಷಕರಿದ್ದರೂ ತುಂಬ ಮಂದಿ’ ಎನ್ನುತ್ತಾರೆ ವಿಜಯ್.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ